ལྷོ་ཁ་གྲོང་ཁྱེར་སྨན་རྩིས་ཁང་གིས་འདི་ལོའི་སྨན་མར་བཟོ་བའི་ལས་གྲྭ་དེ་སྤྱི་ཟླ་༡༢ཚེས་༢༨ཉིན་དངོས་སུ་ལེགས་སྒྲུབ་ཐུབ་པ་བྱུང་བ་དང་། ཉེ་ཆར་སྨན་ཁང་སྒོ་བསྟེན་ཚན་ཁག་ནས་རྒྱ་ཆེའི་འཛད་སྤྱོད་པར་དངོས་སུ་སྤུས་ཚོང་ཞུ་རྒྱུ་ཡིན།
དེ་ཡང་ལྷོ་ཁ་གྲོང་ཁྱེར་སྨན་རྩིས་ཁང་གི་སྨན་གཉེར་འབུམ་རམས་པ། ལྗོངས་རིམ་པའི་མངོན་མིན་རིག་གནས་ཤུལ་བཞག་གི་རྒྱུན་སྤེལ་མཁས་དབང་པ་སངས་ལྷུན་གྲུབ་མཆོག་གིས་རྒྱུན་སྤེལ་གནང་བཞིན་པའི་ལྗོངས་རིམ་པའི་མངོན་མིན་རིག་གནས་ཤུལ་བཞག་གི་ཡ་གྱལ་དུ་གྱུར་བའི་སྨན་མར་སྦྱོར་བཟོའི་ལག་རྩལ་རྣམ་གྲངས་འདི་བཞིན་ལོ་རེ་བཞིན་སྨན་ཁང་རང་ནས་འགྲོ་གྲོན་བཏང་སྟེ་རྒྱུན་འཛིན་སློབ་མ་སྒྲིག་འཛུགས་ཀྱིས་ལག་ལེན་དམར་ཁྲིད་ཀྱི་ཐོག་ནས་སྦྱོར་བཟོ་ཐེངས་རེ་གནང་བར་རྒྱ་ཆེའི་སྨན་སློབ་དང་མང་ཚོགས་ཡོངས་ཀྱིས་དགའ་བསུ་དང་གདེངས་འཇོག་ཧ་ཅང་ལེགས་པོ་ཐོབ་བཞིན་ཡོད།ད་ཆ་སྨན་ཁང་འདི་ནས་བཟོ་སྦྱོར་གནང་བཞིན་ཡོད་པའི་འབའ་སམ་སྨན་མར་ཁ་ཚར་ཅན་འདི་བཞིན་ལྷོ་ཁ་སྨན་རྩིས་ཁང་གི་རྒྱལ་ཁབ་རིམ་པའི་གྲགས་ཅན་སྨན་པ་དགེ་བའི་བཤེས་གཉེན་ཆེན་མོ་འཇམ་དབྱངས་ལྷུན་གྲུབ་མཆོག་གི་ཕྱག་བཞེས་དྲི་མ་མེད་པར་རྒྱུན་འཛིན་གནང་བ་ཞིག་དང་།བཟོ་སྦྱོར་ཐད་སྨན་རྒྱུ་ཚད་ལྡན་ཅན་དང་།བཀོལ་སྤྱོད་ཚད་མཐུན་ཅན།བརྒྱུད་རིམ་ཆ་ཚང་ཅན་བཅས་ཀྱི་རྩ་དོན་རྒྱུན་འཁྱོངས་ཐོག་བཟོ་རྩལ་གྱི་གནད་འགག་ཅི་རིགས་གསོ་རིག་གཞུང་ལས་ཇི་ལྟར་གསུངས་པ་ཇི་བཞིན་ལེགས་སྒྲུབ་ཞུས་ཡོད་པ་ལས་འདི་ལོ་སྨན་སྦྱོར་འདི་ཉིད་ལ་ལྗོངས་སྨན་རྫས་ལྟ་སྐུལ་དོ་དམ་ཅུད་ནས་སྨན་སྦྱོར་ཞུ་ཐེབས་ཀྱི་ཆོག་ཨང་གནང་ཡོད།
འབའ་བསམ་སྨན་མར་ཁ་ཚར་ཅན་གྱི་སྦྱོར་བ་གཙོ་བོ་ནི། འབྲས་བུ་གསུམ་དང་། རྩ་བ་ལྔ། དབང་པོ་ལག་པ། དབྱར་རྩ་དགུན་འབུ། ཁ་ཆེ་གུར་གུམ། བདུད་རྩི་རྟག་ངུ་སོགས་རྩ་ཆེའི་སྨན་སྣེ་ཉི་ཤུ་ལྷག་གི་ཐོག་ལྷད་མེད་ཀྱི་འབྲི་མར་དང་འོ་མ་སོགས་ལས་གྲུབ་ཡོད་ཅིང་། དེའི་ཕན་ཡོན་གཙོ་བོ་ནི། རླུང་མཁྲིས་བད་ཀན་གྱི་འདུ་བ་སྙོམས་ཤིང་ཚེ་བསྲིང་བ་དང་། ལུས་ཀྱི་ཟུངས་སྟོབས་སྐྱེད་པ། རྒས་ཀ་སྲ་བ། དབང་པོ་གསལ་བ། མདངས་བཀྲ་ཞིང་རོ་ཙ་གསོ་བ་སོགས་བཅུད་ལེན་གྱི་མཆོག་ཏུ་གྱུར་བ་དང་། ཁྱད་པར་དུ་མཁལ་ནུས་ཞན་ལ་འདོད་པ་ཉམས་པ་དང་། ཟུངས་ཟད་རླུང་ཤས་ཆེ་བའི་རིགས་ལ་མཆོག་ཏུ་ཕན། གཞན་ཡང་ལུས་སྟོབས་འཕེལ་ཞིང་ནད་འགོག་གི་ནུས་པ་མཐོར་འདེགས་གཏོང་བར་ཤིན་ཏུ་ནས་ཕན་པར་གསུངས་སོ། །
藏公网安备：54222102000062
ཀྲན་ཀྲང་སྡོམ་རྩིས་ | དེ་རིང་། IP[1] | དེ་རིང་། PV[35] | ཁ་སང་IP[1] | ཁ་སང་PV[73] |
